Seichbämsle, Wolfwil

«Me Too»

Ir Föumwäut z’Hollywood hets es mittlers Ärdbebe gä,
töu Produzänte und Stars meine si dörfe aus vor ehri Flinte näh.

Wenn dört füre nöischt Blockbuster e Roue am Set wotsch übercho,
muesch zerscht dr Produzänt und dr Topstar drüberlo.

Gäge dä Harvey Weinstein mit sim spitze Viagrarüebli,
isch sogar dr Berlusconi es harmloses Schwachstrombüebli.

Dä Typ het gmeint er chön die ganzi Föumwäut flachlegge
«Me Too» tönts drum jetz us jedem Egge.

Dr Kevin Spacey het johrelang verschwege,
dass er scho immer lieber Manne het bestege.

Sis «Outing» finde aber bsonders die Schwule gar nid famos,
dä aut Sack isch nämli ou uf Minderjährigi los.

Es isch leider so,
Waffe chasch i de USA fasch a jedem Kiosk go choufe
und jede Voutrottu darf drmit im Züg omeloufe.

Wenns aber um Sex goht, de hei die prüde Amis d’Schnöre zue
und mit de Schwule hätte si am Liebste gar nüt z’tue,
eigentli erstunlich, wöu giggerigi Arschlöcher hei si meh as gnue.

Winstonclub, Balsthal

Wisente

Sit Monate git’s es Gstürm im Thau
Die Wisente aa z’siedle sigi fatau
Die arme Tierli dörfe nid usstärbe, das mues öis glinge
Drum döi mir für sie z’Bauschtu es Plätzli finge
Eis mit Haag und Wassergrabe mir finges famos
E Platz wo süscht niemer brucht, s’Minigolf im Moos

Mischtchratzerli, Kappel

Politik

Der Super-Trump het Stress mit em Korea-Kim
Wäg Atombombe und anderem Klimbim
Es goht ned um die grossi Schnorre, nei, vo däm ke Spur
Es goht ganz eifach um die schönscht Frisur.

Räblüüs, Winznau

Erfahrige

Es chlage Froue überall
Promi - Manne a
die sölle sie - bestimmt es Mol
am Buuse aglängt ha
und denn no küsst – ganz ungeniert
ufs Mul – das sig de schiter
so öppis isch üs nie passiert
Mir tröime noch chli wiiter.

Lobiseitüüfle, Mümliswil

Oktoberfäscht

Es Dirndl, Zöpfli und ab gohts as Oktoberfäscht im Gäupark
Dört äne triibts no mänge Guldetaler, wöu im Fäschte si mir stark.
Doch s’Fahre heizue bekunnt nit immer allne guet, mir heis scho vernoh
Wägem Lisser Sarah hets Taxi 3 mou miesse anhaute, hätsch doch lieber es Mass weniger gnoh.

Gold-Söi, Hägendorf

Turnershow

«Das grosse Finale» – e riise Unterhaltig
Vo Musig plus Turnverein, vo A bis Z gewaltig
S’Ziel esch gse mit dere Gala glänze
Zum Bischpöu dore Ibau vo zwe Videosequänze.

Sequänz Nommer 1: «Empfang der Broadway Stars»
Mit rotem Teppich, Fans und so, wie be de Oscars.
Ou e Luxus Chare het die Szene komplettiert
E Rolls Royce hei si drom organisiert.

Gfahre es dä Chare - dr Rene Bob(er) Na(a)r,
und das nei öppe langsam, das esch be ihm jo klar.
Gäsele und Reife-Quietsche, lang esch das guet gloffe
Bes zmitts ir Föumufahm – dr Rolls esch abgsoffe.
René, du als Garaschischt - wie söue mir verstoh
Dass zom aloh vo dim Rolls, der Mech het müesse cho?

Macarena, Balsthal

Pierino gäge Christine

Dr Roli isch nüme, är isch gange und nimmt dr Huet.
Mir bruuche e nöie «Amme», chunnt jetz aues guet?
D’Ortsparteie haute sich bis zum Schluss bedeckt,
me sig sich noni sicher, Kandidate si no versteckt.
Ganz zum Schluss git’s de e richtige Krimi ume Präsi –
es cha nume no dr Pierino oder d’Christine si.
Am Schluss duet dr Pierino de dütlich brilliere,
s›Chrigi löi mir z’Solothurn obe lo debattiere!
Mit em Pierino wird wieder e Lehrer ar Spitze si
dr letzscht isch bekanntlich jo nid so e Knaller gsi!

Diudäppeli Clique Balsthal

Wisente

Bi eus im Thau, wott me jetze,
d’Wisente wieder ussetze.
Schliesslich chöme sit 13 Johr
und das isch wohr,
z’Bauschtu au wieder Diudäppeli vor!