<section><h2><p>Das sind die diesjährigen Schnitzelbänke aus der Region</p></h2><p></p><p>In ihren Schnitzelbänke nehmen die Gruppen aus dem Niederamt und den Bezirken Olten und Thal/Gäu politische Streitigkeiten aufs Korn oder beschäftigten sie sich mit dem heissen Sommer und den regionalen Highlights.</p><p></p></section><section><h2><p>Söiborschte, Kappel</p></h2><p></p><p>Id Nati A muss s Ziel si, s’Stadion esch wonderbar</p><p>Der Ombou het vöu koschtet, ou das esch aune klar</p><p>Jo Oute muess jetz spare, der EHC hets tscheggt</p><p>Wenn die im Donkle spiele, esch das es Sparprojekt.</p><p><br></p><p>Der WM Leader Dütschland reist of Russland met breiter Bruscht</p><p>Der Jogi esch euphorisch, doch d Mannschaft het kei Loscht</p><p>Trotz Adler ofem Trikot, die Dütsche mache schlapp</p><p>E Doppuadler bruchts haut, sösch störzt dä Vogu ab.</p><p></p></section><section><h3><p>Schlumpf Zunft, Hägendorf</p></h3><p></p><p>Omwäutschutz esch wechtig, drom macht er met</p><p>Trennt Karton, Papier und ou Pet.</p><p>Zwar metem Chare zor Entsorgig fahre,</p><p>Was si mer Mönsche ou för Naare?</p><p><br></p><p>Bem Coop schiesst er d’Fläsche i Deponi</p><p>Ond si Schlössu flügt grad hendedri.</p><p>Drom gsesch ehn jetz im Sack omewüele</p><p>Dr. Küenzi mer fende das zom Brüele.</p><p></p></section><section><h3><p>Fasnachtsverein, Lostorf</p></h3><p></p><p>Dr Hansli roucht ond kifft ond schlotet Tag ond Nacht</p><p>S’esch e Schand, das seit d’Frau Meier, was dä macht</p><p>Ir Oltner Altstadt gseht me Rauch wenn laufsch dorab</p><p>Wenn sis schöne aute Bröggli fackle ab-</p><p><br></p><p>I dämm Sommer hei mer meh als 30ig Grad</p><p>Do söt me sofort näh es chüels erfröschends Bad</p><p>Wichtig esch au emmer gnue vom Wasser z’trenke</p><p>Nur in Lostorf duet das Wasser forchbar stenke.</p><p><br></p><p>Wenn der Donald Trump ir Schwiiz es Bsüechli macht</p><p>Esch är begeisteret vom Bundesrot ond lacht</p><p>Im Keller ond am Herd si d’Froue, s’esch e Hit</p><p>För d’Muur in Mexiko, nemmt är dr Murer mit.</p><p></p></section><section><h3><p>Wöschwiiber, Wolfwil</p></h3><p></p><p>D’Linde z’Fulebach wird verchouft,</p><p>D’Gmeind wott se poschte</p><p>Und das tuet de grad chli choschte.</p><p><br></p><p>Mer finde … das esch guet so,</p><p>Wöu de muess nömm haub Woufu Ost i eusi Beize cho.</p><p></p></section><section><h3><p>Bränte Schnuderi, Kappel</p></h3><p></p><p>In China hei si s erste Baby clont.</p><p>Und die ganzi Wält frogt, öb das sech lohnt.</p><p>Mir finde das super, stöuet öich vor,</p><p>Au vo öis gäbs e vo jedem 3 so Clon.</p><p><br></p><p>Eine zum id Schuel goh, das isch klar.</p><p>E zwöite fürd Husi, wunderbar.</p><p>Dr dritt würde mer zum Häufe isetze.</p><p>Do hätt s Mami doch Fröid, das würd si schätze.</p><p>Au die Clone würde fliisig schaffe,</p><p>Und mir chönte s ganze Johr Fasnacht mache.</p><p><br></p><p>Sesch döppig und heiss im Klassezimmer.</p><p>Und stinke duets no vöu vöu schlimmer.</p><p>Der Lehrer esch füürrot im Gsicht.</p><p>Und nüt passiert im Unterricht.</p><p>So bringt das nüt drom löit öis hei,</p><p>Und gäbet üs ändlech hitzefrei.</p><p></p></section><section><h3><p>Goldsöi, Hägendorf </p></h3><p></p><p>Fitness und Wellness — buumt im ganze Land</p><p>Ou eine vo Rieche macht do met im Prieschtergwand</p><p>Frommi Spröch länge nöm er wot Nöis usprobiere.</p><p><br></p><p>So duet er jonge Giele … jetzt d’Füess und Broscht massiere</p><p>Drom rote mir der … tuet e Geischtleche nöcher rücke</p><p>Sötsch statt d’Händ falte … d’ Arschbacke zämedrücke!</p><p></p></section><section><h3><p>Mischtchratzerli, Hägendorf</p></h3><p></p><p>Der Samichlous, dä arm Cheib han eg chörzlech gseh</p><p>Är esch frustriert was eder Wäut duet gscheh.</p><p>Als Waffe d’Ruete exportiert, der Schmutzli werd usgschafft</p><p>Ond der Esu hets is Wiise Huus ie gschafft.</p><p></p></section><section><h3><p>Seichbämsle, Wolfwil</p></h3><p></p><p>Dr Gänfer Nationalrot Guillaume Barazzone,</p><p>Das Bürschteli isch ou nid ganz ohne.</p><p>42 000 Franke Spese pro Johr tüei sich bi däm Schlawiner ufsumiere,</p><p>Für nächtlichi Taxifahrte, Champagner und 17 000 Stutz elei für mitem Natel z’telefoniere.</p><p><br></p><p>Öis nimmts Wunder, wie dä sire Frou cha erkläre,</p><p>Mit wäm as er do so lang am Handy tuet plääre?</p><p>Dä Typ schöpft gärn uf Staatschöschte usem voue Züber,</p><p>Öise Gmeindspräsi, dr Schorsch, chont im Monet e 5-Liber über.</p><p>Das Gäud spart er de zäme, bis zu de nöchschte Wahle,</p><p>Damit er öis Schnitzubänkler cha ne Rundi zahle.</p><p></p></section><section><h3><p>Dr Eimolig, Kappel</p></h3><p></p><p>E ha e Bummel über d’Chappeler Chilbi gmacht</p><p>Vo zobe am feufi bis churz nach Mitternacht</p><p>E Wuche vorhär beni z’Hägedorf verbi</p><p>Be nach 30 Minute weder deheime gsi.</p><p><br></p><p>Die einzig Attraktion isch dä «Free Fall Tower» gsi</p><p>Es sticht mi der Gwunder e sitze dri</p><p>Für d’Ussicht uf Chappel het sich glohnt das Gäld</p><p>Chum dunde bisch weder am Arsch vo der Wält.</p><p></p></section><section><h3><p>Emanze Gift, Trimbach</p></h3><p></p><p>Z’Olte isches mängisch rechtig animalisch</p><p>Wildsäu a der Aare, es Dänkmal wo för d’Chatz isch</p><p>Schrägi Vögu legge weder ehri Eier</p><p>Ufem Stadthus brüetet jetzt der Pleitegeier.</p><p><br></p><p>Problematisch werds, do gsäi mer rechtig rot</p><p>Eusi alte send halt eifach vel spot tod</p><p>Mer hei d’Idee ond die wird sicher glinge</p><p>Ab 65i darfsch bi rot — öber d’Strosse springe.</p><p><br></p><p>Metem Auto unterwägs, esch en riese Akt</p><p>In Olte hesch fascht jedes mol en Härzinfarkt</p><p>Be im Sälipark go Bio-Eier chaufe</p><p>Bes eg dehei gsi be chöi die Bibeli scho laufe.</p><p></p></section><section><h3><p>Winston’s Club, Balsthal</p></h3><p></p><p>S’Rössli, das isch e Bauschtler Ikone</p><p>Ä Bsuech di däm Huus duet sich ganz sicher lohne</p><p>Scho der Napoleon isch vor sinere Schtäge duregange</p><p>Chli spöter hei die Liberale dört öisi Freiheit chönne erlange</p><p>Vor Churzem het me leider es paar Hooligans müesse gseh</p><p>D’FDP und d’SVP hei sech ufe Gring wöue geh.</p><p><br></p><p>Dr Ackermann Urs isch Kantonsrotspräsi gsi</p><p>Bi jedem Apero isch är z’vorderscht derbi</p><p>Chli Frässe und Suffe, do isch är im Elemänt</p><p>Immer guet druffe, so wie me ne haut könnt</p><p>Doch jetz, wo är wieder sötti i d’Hose</p><p>Tritt är ab, ungerem Motto: die chöi mir i d’Schueh blose.</p><p></p></section><section><h3><p>Lobisei-Tüüfle, Mümliswil</p></h3><p></p><p>Öisi Poscht goht zue hei mir vernoh</p><p>Wohi söu ig jetz mit mine Zalandopäckli go</p><p>Im Coop söus schiins e Agentur geh</p><p>Dört chasch bis am haubi sibni Päckli abgeh.</p><p><br></p><p>Was miesse äch öisi Coopfraue no aues mache</p><p>Die Paari dört hei gar nüt z’lache</p><p>Liebs Coop Mittuland stöuet doch no öbber i</p><p>Bi haubleere Regau chauft niemer gärn i.</p><p></p></section>

Region - Von politischem Theater und Trump: Schnitzelbänke aus der Region

Region Von politischem Theater und Trump: Schnitzelbänke aus der Region

Emanze Gift aus Trimbach führte ihre Schnitzelbänke in Kappel auf.

Region
Von politischem Theater und Trump: Schnitzelbänke aus der Region