Leserbeitrag
Vereinsreise der Frauenriege Villnachern

Margret Güntert
Drucken
Bilder zum Leserbeitrag

Bilder zum Leserbeitrag

Fraueriegereis vom 16./17. August 2014

I däm rägeriche Summer isch es scho es ganz grosses Glück gsi, dass mer für eusi Reis es Guetwätterloch verwütscht händ, well d’Meteo het für ä Samschtig ned welle rüehme. Doch wo mer mit em Zug gäge s‘Bärneroberland cho sind, het scho es bitzeli d’Sunne füre güggelet und z’Luterbrunne hämmer bereits chönne üseri Windjaggene abzieh. Im Steibock hämmer Kafi und Gipfeli gnosse, bevor mer durs Dorf us gäge der Staubbachfall gloffe sind. Dä het sich so mächtig vo der höche Felswand abegstürzt und der Wind het de Wasserstaub so fescht verblose, dass mer gar ned bis zu ihm händ chönne ufestiege. Mer wäre alli tropfnass worde!

Defür sind d’Trümmelbachfäll umso imposanter gsi. Natürlich het’s au do gwaltigi Wassermasse gha, wo sich dur die änge Felse ihre Wäg gsuecht händ, und s’Bsundere dra isch das steile Standseilbähnli gsi, wo is zerscht bis uf die halbi Höchi ufebrocht het. Nochhär hämmer i der Gartewirtschaft us em Rucksack picknicket und nomol äs guets Kafeli gnähmiget. Über d’Asphaltstross isch es dänn uf Stächelbärg hindere gange, wo mer mit der Gondle i zweene Abschnitte uf Mürre ufegfahre sind. Und do het’s afo tröpfele, nume ganz gschwind, grad eso, dass eusi Schirme und d’Rägehüüt es bitzeli nass worde sind. Ä wiiteri Standseilbahn het is uf än Allmendhubel ufebrocht, wo mer nach eme churze Spaziergang üses hütige Tagesziel, d’Pension Sunnebärg erreicht händ. De Sunnebärg liit uf 1‘835 m. Do simmer über euseri mitbrochte Fleecejagge und Pullover scho no froh gsi.

Nach em Zimmerbezug hämmer is uf der Terrasse usse zum Apéro troffe. Vo do hätte mer ä wunderbari Ussicht uf Eiger, Mönch und Jungfrau gha. Aber leider isch es schüüli verhänkt gsi – und au äs bitzeli chalt! S’Nachtässe isch dänn dinne serviert worde: Salat, Lasagne und zum Dessert ä Brönnti Creme. Das het allne gschmöckt!

Gross isch d’Überraschig gsi, wo mer am Morge bim Sunneufgang s’ganze Panorama händ chönne gnüsse. Chum es Wülchli isch no am Himmel gstande. Doch näbem und hinterem Huus sind d’Matte gfrore gsi und uf de Bärge isch de Schnee wiit abecho. Gstärkt dur es sensationells Frühstücksbuffet hämmer is dänn öppis nach de nüne uf ä Wäg gmacht. Ei Gruppe het der Abstieg uf Mürre abe gno und isch dänn im Nostalgie-Bähnli no über d’Winteregg uf d’Grütschalp füre gloffe, die andere händ de Höhewäg über Maulerhubel-Dorenhubel-Pletschenalp-Marchegg-Sausläger-Spryssenwald zu der Bärgstation Grütschalp gmacht. Und immer het is die prächtigi Ussicht uf Eiger, Mönch und Jungfrau, de Männliche und Wenge begleitet. Vo eusem Mittagspicknickplatz us het mer sogar d’Sphinx uf em Jungfraujoch obe ganz guet chönne usmache. Well’s i däm Summer soviel grägnet het und mer drü Wuche ender uf eusi Reis gange sind als süscht, händ no vieli Alpeblueme blüeht und am Wägrand het’s rifi Heidelbeeri gha. Der Abstieg uf d’Grütschalp isch happig gsi. Die 622 m absi sind eim richtig i d’Chnöi ie gfahre. Do händ au d’Stöck nüm viel gnützt! Isch das ä schöne Durscht gsi, wo mer ändlich im Bähnlirestaurant unde acho sind und öppis z’Trinke händ chönne bstelle. Und dänn isch es mit em Gondeli wieder uf Luterbrunne abegange, wo mer am drü is Bähnli igstiege sind. Drümol hämmer müesse umstiege: Z’Interlake-Ost, d’Spiez und z’Bärn. Und immer hämmer mindestens ä halbi Stund Ufenthalt gha. Z’Bärn hämmer die Ziit benützt, um vo der Grosse Schanze us nomol s’ganze Alpepanorama chönne z’gnüsse. Gross isch eusi Freud gsi, wo uf em Bahnhofplatz z’Brugg än Extrabus für eus gwartet het: Eimol ned müesse im Bus inne stoh, well anderi Gruppe au uf d’Reis gange sind! Wie üblich hät be der alte Poscht unde es grosse Empfangskomitee vo euse Manne gwartet und Freud gha, dass mer alli wieder guet hei cho sind.

Mer 24 Fraue danke der Pia und em Rösli für die exzellänti Organisation und die guete Idee für eusi Fraueriegereisli und hoffe, dass die beide das au s’nöchscht Johr wieder mit viel Fantasie und Enthusiasmus agattige wärde: Hebet viele Dank!

Jolanda Kamber

Aktuelle Nachrichten